MHT CET 2026: इंजिनीअरिंग, एमबीए प्रवेशासाठी दोन परीक्षा! कोणते गुण ठरवणार अंतिम मेरिट? जाणून घ्या महत्त्वाच्या सूचना....

राज्यात इंजिनीअरिंग, फार्मसी, कृषी शाखेतील पदवी अभ्यासक्रमांच्या प्रवेशासाठी होणारी एमएचटी-सीईटी (पीसीएम, पीसीबी) परीक्षा पुढील वर्षापासून दोनदा (एप्रिल, मे महिना) घेण्याचा निर्णय घेण्यात आला आहे. त्याचप्रमाणे एमबीए प्रवेशासाठी होणारी सीईटी परीक्षाही दोन वेळा घेण्याचा निर्णय झाला आहे. राष्ट्रीय पातळीवर होणाऱ्या जेईई परीक्षेच्या धर्तीवर हा निर्णय घेण्यात आला असून, या दोन्ही परीक्षांपैकी अधिक गुण मिळालेल्या परीक्षेचे गुण प्रवेशासाठी ग्राह्य धरण्यात येणार आहेत.

राष्ट्रीय स्तरावर जेईईच्या दोन प्रवेश परीक्षा (सीईटी) होतात. त्यामुळे विद्यार्थ्यांना चांगले गुण मिळवण्याची दोनदा संधी उपलब्ध होते. तशाच दोन संधी महाराष्ट्रातील विद्यार्थ्यांनाही या दोन सीईटींद्वारे मिळणार आहे. पहिली सीईटी एप्रिल-२०२६ मध्ये; तर दुसरी सीईटी मे २०२६ महिन्यात होणार आहे. विद्यार्थ्याला कोणतीही एक सीईटी देणे बंधनकारक असून, दुसरी प्रवेश परीक्षा ऐच्छिक असेल. विद्यार्थ्याने दोन सीईटी परीक्षा दिल्यास त्याला दोन्हीपैकी ज्यामध्ये जास्त गुण असतील ते प्रवेशासाठी गृहीत धरले जातील. या परीक्षांचे सविस्तर वेळापत्रक सीईटी कक्ष लवकरच जाहीर करणार आहेत.

विद्यार्थी-पालकांसाठी महत्त्वाच्या सूचना -

१. पहिली सीईटी परीक्षा एप्रिल २०२६ मध्ये होईल.

२. दुसरी सीईटी परीक्षा मे २०२६ मध्ये घेण्यात येईल.

३. एमबीए प्रवेशासाठीही दोन वेळा सीईटी होणार आहे.

४. प्रवेशासाठी कोणतीही एक सीईटी द्यावी लागेल.

५. अधिक गुण मिळणाऱ्या सीईटीचे गुण प्रवेशासाठी ग्राह्य धरण्यात येतील.

६. या परीक्षांच्या गुणांद्वारे शैक्षणिक वर्ष २०२६-२७ साठी विद्यार्थ्यांना प्रवेश घेता येईल.